Waporaji wateka Ubalozi wa Iran huko Damascus (VIDEO)

Video imeibuka ikiyoonyesha waporaji wakifanya uharibifu katika Ubalozi wa Iran mjini Damascus baada ya kuutekwa kwa mji huo mkuu wa Syria na wanajihadi.

Video iliyochapishwa kwenye chaneli ya Telegram inayohusishwa na wanamgambo wa Iraq siku ya Jumapili inaonyesha madirisha yaliyovunjwa katika ofisi izo za ujumbe wa kidiplomasia katikati mwa jiji la Damscus.

Inaonyesha pia athari za risasi kwenye vioo vinavyozuia risasi kwenye lango la jengo hilo.

Watu wengi waliovalia kiraia wanaonekana kwenye video wakiondoa samani, vifaa vya ofisi na vitu vingine kutoka kwa ubalozi huo.

Televisheni ya taifa ya Iran iliripoti Jumapili kwamba “watu wasiojulikana wameshambulia Ubalozi wa Iran” katika mji mkuu wa Syria.

Siku ya Ijumaa, Tehran ilikanusha ripoti ya New York Times kwamba, kuhamishwa kwa wafanyikazi wa ubalozi kutoka Damascus kulikuwa kumeamriwa wakati kundi la kigaidi la Hayat Tahrir-al-Sham (HTS) na vikosi vingine vinavyoipinga serikali vilipokaribia mji mkuu.

Ubalozi wa Urusi, ambao umekuwa mshirika wa Rais wa Syria Bashar Assad pamoja na Iran, unaendelea kufanya kazi mjini Damascus, kwa mujibu wa shirika la habari la TASS. “Kila kitu kiko sawa,” msemaji wa ujumbe wa Urusi aliambia shirika hilo.

Pia siku ya Jumapili vyombo vya habari vya Iraq viliripoti kuwa Baghdad imewahamisha wafanyakazi wa ubalozi wake kutoka Syria hadi nchi jirani ya Lebanon.

Siku ya Jumapili, wanajihadi na makundi mengine yanayoipinga serikali yalidai kwamba wamechukua Damascus na kwamba mamlaka nchini Syria sasa ni yao.

Shirika la habari la Reuters liliripoti, likinukuu vyanzo vya kijeshi, kwamba Assad, ambaye aliongoza nchi ya Mashariki ya Kati kwa karibu robo karne, aliruka kutoka Damascus Jumamosi jioni “kwenda kusikojulikana.”

Kamanda mashuhuri wa HTS Ahmed Al-Sharaa ameripotiwa kutoa amri ya kuwazuia wanamgambo wote mjini Damascus kukaribia taasisi za umma au kurusha silaha angani. Aliendelea kusema kwamba taasisi za serikali zitasalia chini ya usimamizi wa “waziri mkuu wa zamani” wa Syria, Mohammad al-Jalali, hadi zitakapohamishiwa rasmi kwa mamlaka mpya.

Al-Jalali alisema kwamba yuko “tayari kushirikiana na uongozi wowote utakaochaguliwa na watu.” Waziri Mkuu aliongeza kuwa bado yuko katika mji mkuu na ana mwelekeo wa kuunga mkono mwendelezo wa serikali.