Nchi kadhaa za Kiarabu zilizo kando ya Ghuba ya Uajemi zinaihimiza Marekani kutoisitisha kampeni yake ya kijeshi dhidi ya Iran kabla ya kudhoofisha kwa kiasi kikubwa uwezo wa kijeshi wa nchi hiyo, shirika la habari la Reuters liliripoti Jumatatu, likinukuu maafisa wa kikanda.
Ripoti hiyo ilisema serikali hizo hazikuishinikiza Washington kuanzisha vita, lakini zina hofu kuwa kusitisha kampeni hiyo mapema kunaweza kuiacha Iran ikiwa na uwezo wa kutishia njia za usafirishaji wa baharini, miundombinu ya mafuta na vituo vya kibiashara vinavyochochea uchumi wao.
Mazungumzo hayo yanakuja wakati vita vinaingia wiki ya tatu, huku mashambulizi ya anga ya Marekani na Israel yakiongezeka, na Iran ikifyatua makombora na droni katika kambi za Marekani katika eneo hilo pamoja na kuvuruga usafiri kupitia lango muhimu la mafuta la Ghuba ya Uajemi, Mlango wa Hormuz.
Jumatatu, afisa mkuu wa usalama wa Iran, Ali Larijani, alizishutumu nchi za Kiislamu kwa kuiacha Tehran wakati wa vita na kuzikosoa zile zilizoitaja Iran kama adui baada ya mashambulizi katika maeneo yao.
“Je, Iran inatarajiwa kukaa kimya huku kambi za Marekani katika nchi zenu zikitumiwa kuishambulia?” alisema. “Hizi ni visingizio dhaifu.”
Reuters iliripoti kuwa maafisa wa Marekani wamekuwa wakizishinikiza nchi jirani za Kiarabu za Iran kuunga mkono hadharani kampeni ya Marekani na Israel, ikinukuu wanadiplomasia wa Magharibi na Kiarabu waliodai kuwa Rais Donald Trump anatafuta uungwaji mkono wa wazi wa kikanda ili kuimarisha uhalali wa kimataifa wa operesheni hiyo.
Vyanzo hivyo viliongeza kuwa hatua ya kijeshi ya upande mmoja kutoka kwa nchi yoyote ya Kiarabu inaonekana kuwa isiyowezekana kwa sababu ingeifanya nchi hiyo iwe hatarini kulipiziwa kisasi na Iran.
Wanachama sita wa Baraza la Ushirikiano wa Ghuba — Bahrain, Kuwait, Qatar, Saudi Arabia, Oman na Umoja wa Falme za Kiarabu — wamefanya mashauriano machache tu tangu vita vianze, kulingana na maafisa wanaofahamu mazungumzo hayo.
Maafisa wa kikanda waliiambia Reuters kuwa mashambulizi ya hivi karibuni yameimarisha hofu ya muda mrefu: kwamba kuiacha Iran ikiwa na vikosi vikubwa vya makombora au uwezo wa kutengeneza silaha kutaiwezesha kuitishia njia kuu za nishati za eneo hilo kila mvutano unapoongezeka.
Kwa viongozi wengi wa eneo hilo, maafisa walisema, tathmini imekuwa wazi zaidi. Isipokuwa uwezo wa kijeshi wa Iran udhoofishwe kwa kiasi kikubwa, wana hofu kuwa nchi hiyo itaendelea kuweka miundombinu ya nishati na njia za usafirishaji katika hatari.