Tanzania, kupitia moja ya taasisi kubwa za kifedha nchini, imezindua kadi mpya ya biashara ya malipo (debit card) ambayo itawawezesha wamiliki wake kulipwa fidia za kifedha endapo kutatokea changamoto katika safari zao.
Hii inahusisha ucheleweshaji wa ndege, mizigo kupotea au safari kufutwa.
Kadi ya NMB Business Debit Card pia inakuja na bima ya kina ya usafiri.
Benki ya NMB Tanzania imeanzisha rasmi kadi hii rafiki kwa wasafiri wa biashara jijini Arusha.
Kadi hiyo ilizinduliwa wakati wa kikao maalum cha mtandao kati ya uongozi wa taasisi ya kifedha na wanajamii wa kibiashara wa jiji la Kaskazini.
Kadi hii mpya imelenga zaidi wafanyabiashara na wamiliki wa biashara ndogo na za kati (SMEs).
Faida zilizopo kwenye kadi hiyo ya kifedha zinaonekana kulengwa zaidi kwa wasafiri wa kimataifa.
Kwa mujibu wa Mkuu wa Kitengo cha Huduma kwa Wateja Binafsi wa Benki ya NMB, Filbert Mponzi, kadi hiyo inawapa wamiliki punguzo la zaidi ya asilimia 15 kwenye malazi katika hoteli zote zinazomilikiwa na Intercontinental Hotel Group (ICG) duniani kote.
Kwa kuwa Intercontinental Group inaendesha zaidi ya hoteli 6000 duniani, wamiliki wa kadi wanahakikishiwa huduma bora upande huu.
“Zaidi ya hapo, wote wanaofanya uhifadhi wa hoteli kupitia Bookings.com kwa kutumia NMB Business Debit Card wanapata punguzo la asilimia 7,” alisema Mponzi.
Aidha, tiketi za ndege za Emirates Airlines zinazolipiwa kwa kadi hiyo mpya zinawawezesha wamiliki kupata punguzo la hadi Dola 200 za Kimarekani, sambamba na kupata huduma za VIP lounge bure kwenye viwanja vya ndege vya kimataifa.
Kadi hii pia inatoa bima ya usafiri inayowahakikishia wamiliki kulipwa fidia ya hadi Dola 1500 endapo mizigo yao itapotea.
Vilevile, mizigo ikichelewa kufika, mmiliki atalipwa hadi Dola 300, na safari ikifutwa atalipwa hadi Dola 3000.
Kwa upande mwingine, iwapo ndege itachelewa, mteja wa NMB mwenye kadi hiyo atalipwa fidia ya Dola 300.
Kadi pia inatoa bima ya matibabu ya usafiri yenye thamani ya hadi Dola 100,000 kwa huduma za afya, pamoja na posho ya kila siku ya Dola 75 kwa mmiliki akiwa hospitalini.
Tena, endapo mmiliki atapata ajali akiwa safarini nje ya nchi, kadi hii itafidia tukio hilo kwa zaidi ya Dola 50,000, fedha ambazo hulipwa kwa mhusika moja kwa moja.
Kwa upande wake, Mkurugenzi Mtendaji wa Benki ya NMB, Ruth Zaipuna, alisema wameandaa tafrija ya mtandao wa kibiashara ili kupata mrejesho kuhusu huduma zao kutoka kwa jumuiya ya wafanyabiashara jijini Arusha.
“Tunatumia pia jukwaa hili kutambulisha huduma mpya za kibenki zilizoundwa mahsusi kuchochea, kukuza na kuendeleza uwekezaji wa ndani na biashara kupitia maendeleo ya kiteknolojia,” alieleza.
Mmoja wa wajasiriamali walioudhuria hafla hiyo, Frank Kileo, aliipongeza Benki ya NMB kwa kuwa karibu na jamii ya wafanyabiashara, na kutumia fursa hiyo kuishauri benki kuendelea kuchunguza suluhisho zaidi za kidigitali ili kuwafikia wateja.
Kwa sasa, Benki ya NMB ina zaidi ya wateja milioni 9 wanaohudumiwa kupitia matawi 240, mawakala zaidi ya 50,000 na mashine za ATM 751 kote nchini, huku ikiajiri zaidi ya wafanyakazi 3,900.
Benki hiyo ina mali zenye thamani ya shilingi trilioni 13.7, huku mtaji wake wa soko ukiwa shilingi trilioni 2.7 za Kitanzania.